「我間屋買幾多吋好？」呢條問題我哋日日答。答案其實有公式，但公式之外仲有兩件事香港特別要留意 —— 部𨋢，同埋一個好多人估錯嘅心理偏差。
第一步：量咗坐位到電視牆嘅距離
唔使精確到厘米，行幾步大約知就得。量嘅係你平時坐嗰個位到電視擺放嗰幅牆 —— 唔係間房嘅長度。
第二步：除 1.6
4K 電視嘅建議尺寸大約係「觀看距離（厘米）÷ 1.6」。例如坐 2.5 米，即 250 ÷ 1.6 ≈ 156，大約對應 65 吋。
唔想計數，直接對表：
- 1.5 – 2.0 米（多數係睡房）→ 建議 43 – 50 吋
- 2.0 – 2.5 米 → 建議 55 – 65 吋
- 2.5 – 3.0 米 → 建議 65 – 75 吋
- 3.0 – 3.5 米 → 建議 75 – 85 吋
- 3.5 米以上 → 建議 85 – 98 吋
想連闊度、高度、掛牆位一齊計埋，用我哋個電視尺寸對照表同視距計算，入個距離就出晒。
⚠ 拆彈：點解你多數會後悔買細咗
「會唔會太大」係最常見嘅擔心，但實際情況通常相反。原因有兩個。
第一，4K 解像度高，坐得近都唔會見到像素。以前 1080P 年代坐太近會見到格仔，所以「唔好買太大」呢個習慣留咗落嚟 —— 但 4K 已經冇呢個問題。
第二，喺舖頭同喺屋企感覺完全唔同。門市空間大、天花高、周圍有其他大電視做對比，同一部機睇落細成個碼。搬返屋企擺喺牆度，先發現「原來咁啱身」。
所以我哋畀嘅實話係：喺兩個尺寸之間猶豫，通常揀大嗰個。
第三步：落單前 check 部𨋢同門口
呢步係香港限定，亦係最多人漏。電視係一塊硬板，唔會摺 —— 入唔到𨋢就要行樓梯，行唔到樓梯就上唔到樓。
要量三個位：
- 𨋢門闊度同轎廂對角 —— 大電視多數可以斜放入𨋢，量埋對角先準
- 屋企大門闊度 —— 連紙箱計，紙箱比電視本身闊幾厘米
- 走廊轉角 —— 長走廊要轉彎嗰啲位最容易卡住
75 吋以上尤其要 check。唔肯定嘅話 WhatsApp 影張𨋢門相俾我哋，我哋幫你睇。真係入唔到，我哋照送 —— 行樓梯每層加 $100，冇樓層上限。
唔同用途，尺寸取態唔同
睇戲為主
建議行公式上限，甚至再大一級。沉浸感直接同視野佔比掛鈎，睇戲呢樣係買大咗唔會錯。
打機
坐得近嘅話唔好過大 —— 太大要轉頭先睇到成個畫面，反而影響反應。呢個情況公式跟得住就啱。
睇新聞、開住做背景
可以保守啲，公式下限已經夠。
房間／睡房
距離短，43 至 50 吋通常最合理。呢個尺寸段亦係最抵買嗰段。
尺寸同價錢嘅關係
唔係線性 —— 由 55 跳去 65 吋嘅差價，通常細過由 85 跳去 98 吋。中段尺寸（55 至 75 吋）競爭最激烈，選擇最多、性價比最高。
而家我哋有貨嘅：43 吋、55 吋、65 吋、75 吋、85 吋、98 吋。
常見問題
坐 2 米買 65 吋會唔會太大？
唔會。2 米按公式係 55 – 65 吋，65 吋喺上限但完全合理，睇戲仲會覺得更爽。
65 同 75 吋差幾多？
畫面面積差大約三分之一，唔係一成兩成。企喺舖頭望好似差唔多，返到屋企分別好明顯。
掛牆同放電視櫃，尺寸考慮一唔一樣？
掛牆可以慳返電視櫃嘅深度，等於變相坐遠咗少少，通常可以再上一級尺寸。放櫃就要留意櫃面闊度夠唔夠。
75 吋入唔到𨋢點算？
照送。行樓梯每層加 $100，冇樓層上限。落單前 WhatsApp 講聲，我哋安排人手。
點量最準？
坐喺你平時嗰個位，量到電視牆。唔想量嘅話，WhatsApp 影張客廳相加大約距離俾我哋，我哋幫你判斷。
相關工具同產品
電視尺寸對照表同視距計算｜電視現貨總覽｜送貨、安裝同保養詳情
保養同聯絡
量完唔肯定？WhatsApp +852 9847 9793，影張客廳相同埋大約距離，我哋直接答你邊個尺寸啱。門市：觀塘興業街 15 號中美中心 A 座 403 室，可以親身企遠啲睇實物。
